وصلت الى موقع "فرفش" هذا الاسبوع رسالة من فتاة تقول ان عمرها (15 عاما) وانها لم تذق طعم الحنان والمحبة من امها التي ينبغي لها ان تكون نبع المحبة والحنان، وتقول الفتاة انها تعصى والدتها ليس رغبة في التمرد عليها، بل لان امها تتعمد استفزازها وتشتمها وتسخر منها وتعايرها عندما تفشل بدل ان تشجعها وتكون داعمة لها. واليكم الرسالة كما وصلتنا:
بمناسبة عيد الأم بحب اقول اني ما بحب امي، لان الامومة اللي بحكو عنها بالكتب والبرامج التلفزيونية ليست هي الام اللي تعيش معنا، او نعيش معها في البيت. امي انسانة عنيفة، وانا صار عمري 15 سنة وبعدني بتعرض للضرب والاهانة منها اذا جاوبتها، أو اذا رفعت صوتي، مع انها هي اللي بتستفزني بطلباتها، وبحس مرات انها بتطلب مني اشياء بس عشان تفتعل مشكلة بيني وبينها وبالآخر بتضربني.
"الأم التي يحتفل بها عيد الأم هي ليست أمي"
انا مش بنت عاصية ربنا، انا بدي اكون مطيعة لامي وأبوي، وبدي اياهن يرضو عني بس انا ما بشوف فيهن الحنان، خصوصا امي، يعني ابوي بحبني وبسايرني، وبعمرو ما مد ايدو علي بس بحس انو امي هوايتها تضربني وبتستفزني واذا ما عملت هيك ما بتنام الليل!
لما أكون ادرس او أحضر تلفزيون بتكتر طلباتها، واذا بقول لها "كمان شوي" بتصر على كلامها أكتر، وبتصير بدها الاشي ينعمل "اسا" بقول لها اني بدرس بتصير تقوللي "انت واحدة فاشلة يما" "دروسك وقل تها واحد" "قومي تحركي قبل ما أوصلك" وهيك طول النهار والليل. وبعمري ما بتذكر انها قالت "الله يرضى عليك يما" دايما دواعي "الله يوخدك" و "ريتني أقبرك"! بحياتكو انا لازم احتفل بعيد الأم؟!!! جاوبوني.