رمضان كريم.. كل عام وانتوا بخير اخواني قراء فرفش.. بدي اعرض عليكوا في السطور التالية مشكلة حصلت مبارح في بيتنا دون ما يعرف فيها حدا غيري.. هاي المشكلة مقلقيتني ومش عارفة حل لالها. المشكلة باختصار، انا في الـ 17 من عمري، مبارح منمتش الليل بسبب اني شفت اختي الصغيرة بنت الـ 15 سنة.. متخبية في المطبخ وبتطل ع بكل الاتجاهات.. ولما بتتأكد انه مفيش حدا، بتمد ايدها للطعام وبتتناول منه لقمات وبتوكلها. الكل في البيت مفكر انا كلنا صايمين.. انا واهلي واختي والكل الكل.
بعد ما شفت اختي اقتربت منها وامسكت فيها من ايدها. اختي تفاجأت، احمر وجهها واصفر وظهرت الحيرة على ملامحها. سألتها ليش بتعملي هيك؟ ليش بتدعي انك صايمة وانت مفطرة في الواقع؟ اختى قالتلي انها مقدرتش تصوم اليوم/ المقصود مبارح بالطبع.. وانها مش رايحة تغلط مثل هاي الغلطة في المستقبل وقالتلي انها رايحة تصوم المتبقي من ايام رمضان الكريم. ترجتني اني ما احكي لحدا..
انا سكتت. بس في احساس بقلي انه سكوتي غلط. في الليل، ليل مبارح، منمتش وانا افكر شو اعمل اقول لاهلي انها مفطرة، والا اتستر عليها زي ما طلبت مني خاصة انها وعدتني بانها ما تعود على مثل هذه الغلطة ؟ احكي لاهلي والا اسكت؟ وساعتها بتنكر لاهم قيم رمضان وهي قيمة الصدق والاستقامة؟ انا حيرانه وبحاجة لآراء ترشدني الى سواء السبيل اثابكم الله واغناكم عن الوقوع في مثل ما وقعت فيه مع اختى الصغرى الصائمة خارجيا المفطرة داخليا؟ انتظر اراءكم وتعقيباتكم.. مع اطيب الامنيات في الشهر الفضيل.
ملاحظة: الصور للتوضيح فقط!