ومن جدايل شمس مرخية وبكمش وهج وبحولوا بوسات بلون أشواقي ماوردية
والطفل كنت بشلحوا البسمات وبغرف من عيونو صفا النية وعرس الربيع بشلحوا الغنجات وكل شي معو لهتات عطرية
ومن كل طير بنتف الريشات وبفرش طريقك ريش حرية وعالمروج بسابق النحلات بجبلك ضمير زهور بكرية
وبطير مع احلام الخيالات ع بلاد مدري وين مبنية وبجدلك من سوالف الغيمات مرجوحتك على كتاف جنية وبغزلك شراشف من الهمسات وفراش من قلبي نعومية
و جودله من السحر ومخدات من شعر آلهة الفنيقية وبرش ع جفونك هنا الغفوات المحروم منها حصا عينيي
و خلّي الحلم يحكيلك حكايات عن حالك لحالك غرامية هيهات لو عندي فعل هيهات عقد ما عندي انانيه
احولك انتي انا بالذات وبلبسك روحي الطبيعية لكن اذا فشلو التمنيات وعمري و عمري استسلم للعبودية بترك مني إلك تلات كلمات محبتي و الااه و النهدات من القلب للقلب ياللي حبك هدية يا ريت عندي و آخ لو فيي