وصلت الى موقع "فرفش" منذ اسابيع رسالة من شاب يتحدث فيها عن "الخدعة" التي تعرض لها من قبل الفتاة التي احبها بكل عواطفه واحاسيسه، وبعد ان كان هو وهي بحكم المخطوبين امام الناس اختارت ان ترتبط بصديقه الذي كانت قد انكرت في السابق وجود علاقة بينها وبينه. ومنذ تلك اللحظة اصبح يتعامل معها بجفاء ويتجاهلها حتى انقطع عنها كليا، لكن قلبه لا يزال يميل اليها. واليكم القصة كما وصلتنا:
انا شاب عمري 25 تعرفت على بنت بقصة حب دامت سنتين.. بصراحة حبيتها كتير عشقتها افديتها بروحي كانت كل حياتي وامها حبتني، وانا كنت واضح معها من الاساس ومفهمها انو انا ما بدي اصاحب انا بدي اخطب لأني شايفها ام اولادي..
هي من طرفها كانت حامي - بارد!! يوم بدها ويوم ما بدها.. سنتين مع بعض بالشغل وبرة الشغل، وكل الي حوالينا سواء زملاء العمل او الاصدقاء كانوا يعتبرونا بحكم المخطوبين والحبايب اللي لا يمكن يفترقوا.
بيوم حكت معي صديقة النا مشتركة وحكتلي انو دير بالك منها ونسيبك اللي هو المفروض صديقي كمان ومن جيلي بدو اياها وبيرسم عليها.. انا من جهتي حكيت معها وحكت لي لأ ما في شي بيننا، بس انا كنت حاسس انو في شي.
المهم بعد فترة وأنا بحكي معها وماخد الموضوع الي بينها وبين الشخص اللي المفروض صاحبي ما بيتعدى الزمالة لانو معنا بالشغل لكن اجتني بالآخر وحكت لي انو انا صديق لها لكنها بدها اياه هو!!
انا انصدمت وقلبت حياتها جحيم وبطلت اعبرها ولا اعبرو لدرجة انو صارت تبكي قدام الكل وكل مرة يجوني ناس يحكولي حرام اللي بتعملو فيها، وانا مصر على تجاهلي لها، وتركت شغلها من وراي لانو مو قادرة تتحمل الوضع واحنا صاير لنا شي 3 سنين تاركين وما بعرف اذا لساتها مرتبطة بهداك الشاب، لاني قطعت علاقتي فيه.
بس انا عن جد نفسي ترجع هديك الايام وبنفس الوقت كرامتي عازة علي حتى تلفون ما رنيت لها من يوم ما تركنا وكل ما حدا يفتح الموضوع قدامي بسكرو.. مو عارف شو اعمل قلبي من جهة وكرامتي من جهة اخرى.. الرجاء لا تهملو رسالتي.. مع الشكر.
